ॲड. माधुरी पवार यांची जागतिक भरारी : ‘वेस्ट रिसायकलिंग प्रोजेक्ट’ने आंतरराष्ट्रीय मंच जिंकला

ॲड. माधुरी पवार यांची जागतिक भरारी : ‘वेस्ट रिसायकलिंग प्रोजेक्ट’ने आंतरराष्ट्रीय मंच जिंकला

शेतातील टाकाऊ वस्तूंना सर्जनशीलतेची जोड देत पर्यावरणपूरक उद्योग उभारणाऱ्या ॲड. माधुरी देवानंद पवार यांनी आंतरराष्ट्रीय पातळीवर झेप घेतली आहे. मराठा उद्योजक असोसिएशनच्या वतीने आयोजित ‘अहद ऑस्ट्रेलिया ते कॅनडा, अवघा मुलुख आपला’ या उपक्रमात त्यांच्या ‘वेस्ट रिसायकलिंग प्रोजेक्ट’चा विशेष सन्मान करण्यात आला. स्थानिक संसाधनांवर आधारित या नाविन्यपूर्ण प्रयोगाला जागतिक व्यासपीठ मिळाल्याने महाराष्ट्राच्या मातीतील उद्योजकीय क्षमतेची दखल घेण्यात आली. पुणे येथे या कार्यक्रमास विविध क्षेत्रांतील मान्यवर, उद्योगपती, स्टार्टअप उद्योजक आणि असोसिएशनचे पदाधिकारी मोठ्या संख्येने उपस्थित होते. कचरा व्यवस्थापन क्षेत्रात आदर्श मॉडेल उभे केल्याबद्दल ॲड. माधुरी पवार यांचा गौरव करण्यात आला. मक्याची टरफले (कॉर्न हस्क्स) शेतात वा बाजारात टाकाऊ समजली जातात. याच टरफलांपासून रंगीत व आकर्षक फुलांचे गुच्छ, सजावटीच्या वस्तू आणि गृहसजावटीचे साहित्य तयार करण्याचा उपक्रम ॲड. माधुरी पवार यांनी यशस्वीपणे राबवला आहे. नैसर्गिक व पर्यावरणपूरक असलेल्या या उत्पादनांना देशांतर्गत तसेच परदेशी बाजारपेठेत चांगला प्रतिसाद मिळत आहे. प्लास्टिकला पर्याय ठरणारी ही उत्पादने पर्यावरण संवर्धनाच्या दृष्टीनेही महत्त्वाची ठरत आहेत. कार्यक्रमात मार्गदर्शक प्रविण दादा गायकवाड यांनी मराठा उद्योजकांच्या गुणवत्तेचा उल्लेख करत सांगितले की, योग्य व्यासपीठ आणि जागतिक दृष्टीकोन मिळाल्यास ग्रामीण उद्योगही आंतरराष्ट्रीय बाजारपेठेत यश मिळवू शकतात. स्थानिक कचऱ्याचे मूल्यवर्धन करून परदेशात पोहोचवणे ही ‘लोकल टू ग्लोबल’ संकल्पनेची प्रभावी अंमलबजावणी असल्याचे त्यांनी नमूद केले. ॲड. माधुरी पवार यांच्या प्रकल्पाचा सामाजिक पैलूही महत्त्वाचा आहे. उत्पादन प्रक्रियेत ग्रामीण महिलांना रोजगार उपलब्ध करून देण्यात आला आहे. त्यांना प्रशिक्षण देऊन स्वावलंबनाचा मार्ग खुला करण्यात आला असून अनेक कुटुंबांच्या आर्थिक स्थितीत सुधारणा होत आहे. या सन्मानामुळे ‘वेस्ट रिसायकलिंग प्रोजेक्ट’ला नवी ओळख मिळाली असून भविष्यात निर्यात संधी वाढण्याची शक्यता व्यक्त केली जात आहे. स्थानिक पातळीवरील सर्जनशीलता आणि जिद्द जागतिक पातळीवर झळकू शकते, याचे उदाहरण म्हणून माधुरी पवार यांचा प्रकल्प पुढे आला आहे.
ॲड. माधुरी पवार यांच्या यशाने स्पष्ट संदेश दिला आहे की, कचऱ्यातही संधी दडलेली असते. दूरदृष्टी, कल्पकता आणि धाडस यांच्या जोरावर स्थानिक उपक्रमही जागतिक भरारी घेऊ शकतात. महाराष्ट्राच्या मातीतील उद्योजकीय तेज आता जागतिक मंचावर झळकू लागले आहे, आणि त्या तेजस्वी प्रवासात ॲड. माधुरी देवानंद पवार यांचे नाव अभिमानाने घेतले जात आहे.